'ബിജെപി ചര്‍ച്ച് ബില്ലായിരിക്കും കൊണ്ടുവരിക; അതിലൂടെ ക്രിസ്ത്യന്‍ സ്വത്തുക്കളിലും കൈകടത്തും': ഹൈബി ഈഡന്‍ എം പി

ന്യൂഡല്‍ഹി: ലോക്സഭയില്‍ വഖഫ് ബില്ലിനെ തുടര്‍ന്നുള്ള ചര്‍ച്ച തുടരുന്നു. ബില്ല് മുസ്‌ലിം-ന്യൂനപക്ഷ വിരുദ്ധമാണെന്ന് ഹൈബി ഈഡന്‍ എംപി പറഞ്ഞു. മുനമ്പം വിഷയം ബിജെപിക്ക് രാഷ്ട്രീയമായിരിക്കാമെന്നും എന്നാല്‍ തനിക്ക് വ്യക്തിപരമായ പ്രശ്‌നമാണെന്നും ഹൈബി ഈഡന്‍ പറഞ്ഞു.

വഖഫ് ബില്ലിലെ ഏത് വ്യവസ്ഥ പ്രകാരമാണ് മുനമ്പം പ്രശ്‌നത്തിന് പരിഹാരമാവുകയെന്നും ഹൈബി ഈഡന്‍ ചോദിച്ചു.

ബിജെപി ചര്‍ച്ച് ബില്ലായിരുക്കും കൊണ്ടുവരികയെന്നും ഹൈബി ഈഡന്‍ പറഞ്ഞു. അതിലൂടെ ക്രിസ്ത്യന്‍ സ്വത്തുക്കളിലും കൈകടത്തുമെന്നും ഹൈബി ഈഡന്‍ കൂട്ടിച്ചേര്‍ത്തു.

വഖഫ് ബില്ലിന്മേലുള്ള ചര്‍ച്ചയ്ക്കിടെ ലോക്സഭയില്‍ പ്രതിപക്ഷ-ഭരണപക്ഷ അംഗങ്ങള്‍ തമ്മില്‍ വാക്‌പോരുണ്ടായിരുന്നു. കേന്ദ്രമന്ത്രി കിരണ്‍ റിജിജുവാണ് ലോക്സഭയില്‍ വഖഫ് ബില്ലിനുള്ള പ്രമേയം അവതരിപ്പിച്ചത്. ജെപിസിയില്‍ വിശാല ചര്‍ച്ച നടന്നുവെന്നും വിശദമായ ചര്‍ച്ചയ്ക്ക് ശേഷമാണ് ബില്ല് തയ്യാറാക്കിയതെന്നും അദ്ദേഹം പറഞ്ഞു. ബില്‍ മുസ്‌ലിം വിരുദ്ധമല്ലെന്ന് കേന്ദ്ര ആഭ്യന്തര വകുപ്പ് മന്ത്രി അമിത് ഷാ പറഞ്ഞു. വഖഫിലെ അഴിമതി അവസാനിപ്പിക്കാനാണ് ബില്‍. ന്യൂനപക്ഷങ്ങളുടെ ഉന്നമനമാണ് ലക്ഷ്യം. പ്രതിപക്ഷം രാജ്യത്തെ വിഭജിക്കാന്‍ ശ്രമിക്കുന്നുവെന്നും അദ്ദേഹം പറഞ്ഞിരുന്നു.

ബില്ലിനെതിരെ പ്രതിപക്ഷം ശക്തമായി പ്രതിഷേധിച്ചു. മതത്തിന്റെ പേരില്‍ രാജ്യത്തെ വിഭജിക്കുകയാണ് സര്‍ക്കാരിന്റെ അജണ്ടയെന്ന് കെ സി വേണുഗോപാല്‍ എംപി പറഞ്ഞു. ന്യൂനപക്ഷത്തിനെതിരല്ല ബില്‍ എന്നാണ് കേന്ദ്രമന്ത്രി കിരണ്‍ റിജിജു ആവര്‍ത്തിച്ച് പറയുന്നത്. കുറ്റബോധമാണ് മന്ത്രിയെക്കൊണ്ട് ഇത് പറയിക്കുന്നതെന്നും കെ സി വേണുഗോപാല്‍ പറഞ്ഞു. മുനമ്പത്ത് നീതി ലഭിക്കണം എന്നാണ് തങ്ങളുടെ താല്‍പര്യമെന്നും മുനമ്പത്തിന്റെ പേരില്‍ രാഷ്ട്രീയ താല്‍പര്യം നടപ്പാക്കരുതെന്നും കെ സി വേണുഗോപാല്‍ വ്യക്തമാക്കിയിരുന്നു.

മുസ്ലിം ജനവിഭാഗം രാജ്യത്തിന്റെ ശത്രുക്കളാണെന്ന് വരുത്തി തീര്‍ക്കാന്‍ ശ്രമം നടക്കുന്നുവെന്നായിരുന്നു കെ രാധാകൃഷ്ണന്‍ എംപി പറഞ്ഞത്. വഖഫ് ബില്ല് ഭരണഘടന ഉറപ്പ് നല്‍കുന്ന മൗലികാവകാശങ്ങളുടെ ലംഘനമാണ്. വഖഫ് സ്വത്തുക്കളുടെ നിയന്ത്രണം കേന്ദ്രീകരിക്കാനും മുസ്ലിം സമൂഹത്തിന്റെ അവകാശങ്ങളെ ദുര്‍ബലപ്പെടുത്താനും മതപരമായ കാര്യങ്ങളില്‍ സര്‍ക്കാര്‍ അതിക്രമിച്ച് കടക്കുന്നതിന്റെ അപകടകരമായ കീഴ്വഴക്കം സൃഷ്ടിക്കാനും ഈ ബില്ല് ഉദ്ദേശിക്കുന്നുവെന്നും കെ രാധാകൃഷ്ണന്‍ ചൂണ്ടിക്കാട്ടിയിരുന്നു.

Content Highlights: Hibi Eden against Waqf bill on Lok Sabha